23.12.2014

O orzamento municipal de Foz para 2015 aprobouse no pleno da corporación cos votos a favor do PP e a abstención dos ex concelleiros do PSOE e do edil do BNG.

Unifoz e Jaime Cancio votaron en contra “para intentar bloquear o concello, unha vez máis”.

Imprimir

Foz, 23 de decembro de 2014.- O orzamento municipal de Foz para o vindeiro ano 2015 aprobouse no pleno da corporación celebrado onte cos votos a favor do Partido Popular e a abstención dos ex concelleiros do PSOE e do edil do BNG. Unifoz e Jaime Cancio votaron en contra “para intentar bloquear o Concello, unha vez máis”, explicou o alcalde, Javier Jorge Castiñeira.

O rexedor municipal focense manifestou hoxe que “o grupo de goberno do Concello de Foz está moi contento por aprobar os orzamentos do ano 2015 grazas aos votos favorables do grupo popular e as abstencións dos non adscritos, ex concelleiros do Partido Socialista, e tamén do edil do BNG. Hai que lamentar, coma sempre durante estes catro anos, o voto en contra dos dous representantes de Unifoz e do concelleiro non adscrito Xaime Cancio. Novamente estes tres concelleiros actúan en unión, da mesma maneira, evidentemente mandados polo señor Cancio, para tratar de bloquear o Concello. Pero estamos contentos porque o grupo de goberno conseguiu sacar adiante uns orzamentos, consensuando co resto dos grupos que se ofreceron para elo unha solución, que consiste en que no mes de xaneiro irá a pleno unha modificación de crédito para que se poidan levar adiante as propostas e emendas que fixeron estes grupos, entre elas un plan de emprego e tamén unha serie de inversións que haberá que pactar entre todos nas diferentes comisións. O crédito que se valora para estas emendas é de arredor duns 200.000 euros, que virán da partida de créditos bancarios, de 165.000 euros, que vai estar amortizada a primeiros de ano, máis uns 35.000 euros que se quitarán do fondo de continxencias. Polo tanto sumaremos 200.000 euros, que en comisión decidirase a que se van destinar”.

Javier Castiñeira engadiu que “isto demostra unha vez máis o afán conciliador do equipo de goberno, que podía aprobar estes orzamentos en comisión de goberno, pero o que queríamos é que fora o pleno o que o fixera. E así se fixo, polo que hai que agradecer aos concelleiros non adscritos e ao BNG ese afán dialogante. Pero hai que seguir recriminando a estes tres concelleiros, os de Unifoz e Xaime Cancio, que sigan dándolle as costas ao Concello”.

O alcalde destacou que “estes orzamentos, aparte de conseguir que o Concello de Foz quede sen deberlle un só euro aos bancos, permiten facer unha serie de inversións importantes para o municipio, sobre todo en instalacións deportivas que o necesitan, como no Campo da Cabana ou no campo de fútbol de Malates. Van permitir tamén incrementar en 36.000 euros a partida para subvencións e así concederllas a colectivos que non as recibían: o asilo, a asociación de discapacitados, a protectora de animais, o grupo Andaravío, ...; tamén para clubs que non a tiñan, como do de tenis, a escola náutica; e para o servizo de Preescolar na casa que se está dando no noso concello, entre outras. Ademais posibilitarán varios investimentos en estradas e vías municipais que o precisan”.

Castiñeira comentou tamén que “polo tanto estamos contentos, porque vamos ter un bo inicio de ano con esa promesa de que no pleno do mes de xaneiro xa irá esa modificación orzamentaria para atender, con eses 200.000 euros que vamos ter, as emendas que presentaron tanto os concelleiros non adscritos coma o BNG. Entre elas están un plan de emprego e outra serie de inversións”.

O rexedor rematou salientado que “as boas contas do Concello permiten que haxa inversións e posibilitan chegar a acordos, polo que se vai poder facer un plan de emprego, como desexa a maioría da corporación. Polo tanto estamos contentos, xa que o Concello iniciará o 2015, despois de moitos anos, cuns orzamentos completamente actualizados e modernos, que van permitir que o Concello non teña eses problemas e desaxustes económicos que tivo durante estes anos pasados”.