08.01.2014

Aclaracións oportunas e necesarias a Unifoz e PSOE.

O alcalde focense recomenda a Unifoz que traballe en positivo e deixe de danar a imaxe do municipio e de ir en contra dos veciños coas súas falsidades.

Javier Castiñeira aclara ao socialista José Ramón Val que nos orzamentos da Xunta para este ano hai un partida de 770.000 euros para a construción do xeriátrico en Foz.

Imprimir
Foz, 8 de xaneiro de 2014.- O alcalde focense, Javier Jorge Castiñeira, resposta hoxe ás críticas ao balance do pasado ano 2013 realizadas por Unifoz e PSOE. O rexedor recomenda aos concelleiros de Unifoz que traballen en positivo e deixen de danar a imaxe do municipio e de ir en contra dos intereses dos veciños coas súas falsidades. E ao responsable local socialista, José Ramón Val, acláralle que nos orzamentos da Xunta para este ano hai unha partida de 770.000 euros para a construción do xeriátrico en Foz.

Unifoz non é a chave, e a pechadura contra os intereses municipais.

“O grupo de goberno quere denunciar a actitude desleal do partido Unifoz, dos seus concelleiros e concretamente de Xaime Cancio. É vergonzoso ver as súas notas de prensa contra o Concello de Foz, porque este señor intenta desprestixiar ao grupo de goberno pero o que está facendo é prexudicar ao concello con falsidades completas e demostrando unha rabia política insostible. É unha persoa que non está acostumada a estar na oposición e un partido que naceu para ser chave de goberno estase convertendo nunha auténtica cerradura contra os intereses municipais. Estase demostrando que este señor non é capaz de chegar a ningún acordo, iso estao poñendo nervioso e falta o respecto non só ao grupo de goberno senón tamén a todos os veciños de Foz. Está desprestixiando a imaxe de Foz e vai en contra dos intereses de todos os focenses, que ven danada a imaxe do noso concello por unhas declaracións duns concelleiros totalmente desleais”,
manifestou Javier Castiñeira.

O alcalde recoméndalle “ao señor Cancio que cambie de actitude, que deixe de mirar os seus intereses persoais, porque é evidente que iso é o que está facendo, e que empece a mirar os intereses de Foz, que pense en positivo, que trate de chegar a acordos, porque aínda está a tempo de ser chave para sacar cousas adiante; e que non siga bloqueando, con ese cadeado que el está poñendo á corporación, os intereses do concello. E dende logo que non faga notas de prensa suicidas, que din claramente que este señor está rabioso e intentando loitar contra os intereses do propio Concello”.

O señor Val descoñece os orzamentos da Xunta.

Con respecto as declaracións do socialista José Ramón Val, o rexedor municipal manifestou que “van un pouco no mesmo sentido que as do señor Cancio, pois debeuse de transformar no seu asesor, e teño que dicirlle que traballe un pouco, que mire os orzamentos da Xunta porque na partida do Consorcio Galego de Igualdade e Benestar hai 770.000 euros dedicados á primeira fase da construción do xeriátrico de Foz. Polo tanto que non diga mentiras, que este señor está asalariado por todos os galegos e ten a obriga de coñecer os orzamentos da Xunta de Galicia”.

Castiñeira engadiu que “en canto ás críticas desleais tratando de manchar a imaxe do noso pobo, non me estraña porque é exactamente a mesma nota de prensa que fixo o señor Cancio, que se volveu agora o asesor do señor Val. A verdade é que xa non nos sorprende porque o señor Cancio meteulle na xunta directiva ao señor Val dous ou tres topos da súa man para manipular o Partido Socialista e xa non nos estraña que agora lle faga as notas de prensa”.

O alcalde de Foz rematou recomendándolle “ao señor Val que mire o seu embigo, que mire como ten ao Partido Socialista totalmente dividido, que mire como os que traizoaron no seu momento ao PSOE agora están manipulando precisamente a directiva do partido. E ademais ten moi pouco criterio para falar do concello de Foz porque este señor foise da corporación para buscar un futuro particular moito mellor. Polo tanto, señor Val: dedíquese a traballar un pouco, mire os orzamentos da Xunta, asesórese un pouco mellor e despois fale o que queira pero con certo criterio”.